Акафист Царской Семье

Акафист Царственным Мученикам

АУДИОВЕРСИЯ 

Кондак 1
Избраннии и всехвальнии царственнии мученицы и страстотерпцы, державы Российския заступницы и о людех ея молитвенницы святии: благоверный царю Николае с царицею Александрою и царственными чадами: Алексием, Ольгою, Татианою, Мариею и Анастасиею, похвальное пение приносим вам с верою и любовию, вы же, яко имущие дерзновение к прославившему вас Господу, ограждайте нас от всяких зол и бед молитвами вашими, да зовем вам:
Радуйтеся, святии царственнии мученицы и страстотерпцы, за землю Русскую пред Богом молитвенницы.

Икос 1

Ангелов Творец и всего мира Царь и Господь, управляяй судьбами народов и государств в воле Своей, воздвиже в стране Российстей род царей благочестивых и избра тя, царю Николае, с семьëю твоею в жертву живую, всеусердную и благоприятную Богу. Мы же дивящеся таковому о Вас Божию смотрению, во умилении сердец зовем вам:
Радуйся, помазаниче Божий, святый царю Николае, престола царства Российскаго украшение;
Радуйся, царице Александро, мудрых жен христианских красото и славо;
Радуйся, царевичу Алексие, жертво непорочная, Богу принесенная;
Радуйтеся, истинные невесты Христовы и страдалицы за Него: Ольго, Татиано, Марие и Анастасие;
Радуйтеся, Христа Спасителя всем сердцем возлюбившии;
Радуйтеся, верность Ему даже до смерти сохранившии;
Радуйтеся, многия скорби в жизни претерпевшии;
Радуйтеся, страстем Христовым мужественно подражавшии;
Радуйтеся, на Небеси и на земли от Господа прославленнии;
Радуйтеся, страны Российския милостивии покровители;
Радуйтеся, фимиам молитв за нас к Богу приносящии;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 2

Видев сердцеведец Господь твое твердое изволение верою и правдою послужити Богу и народу своему, благоизволи помазати тя, богоизбранный царю Николае, на царство Российское; ты же принял еси венец царский яко послушание Богом данное, и многия труды подъял еси во имя могущества и благоденствия державы Российския, воспевая давшему ти благодать и силу, Ангельскую песнь: АЛЛИЛУИА.

Икос 2

Разумом светлым и чистым сердцем повинуяся изволению Божию, благое иго Христово взяв, бразды правления державы Российския приял еси, святый царю Николае. К тому же поревновал еси созиданию храмов и обителей иноческих, святых угодников Божиих прославлению и Православныя Церкви утверждению. Сего ради прославляем ревность твою в служении сем, зовем ти тако:
Радуйся, от юности сердце свое Господеви предавый;
Радуйся, помазаниче Богом избранный;
Радуйся, царское служение со страхом Божиим совершавый;
Радуйся, могущество и славу державы Российския укрепивый;
Радуйся, насадителю в ней истиннаго просвещения и благочестия;
Радуйся, о благе народа усердное попечение имевый;
Радуйся, и ныне всех нуждающихся пред Господем предстателю;
Радуйся, храмы и обители иноческия земли Российския украсивый;
Радуйся, Святыя Православныя Церкви верный защитниче;
Радуйся, душу свою за люди российския и Отечество наше положивый;
Радуйся, венцем от Царя Славы венчанный;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 3

Силою свыше укреплённый, мужественно проходил еси предлежащий ти подвиг служению Богу, Отечеству, своему народу и всем православным народам заступник был еси, егда подвигнул еси воинство русское на спасение страны Сербския и на брань победоносную противу врагов России и веры православныя. Тем же воспеваем укрепившему Тя Богу: АЛЛИЛУИЯ

Икос 3

Имея в сердце своем твердое упование на всесильную помощь Божию и пламенное желание послужити державе Российстей, глаголал еси, страстотерпче святый: несть тоя жертвы, юже не принесл бы за благо Отечества моего: Тако научи и нас души полагати за спасение страны нашея, заповедь любви исполняющи, воспевая тебе, святый царю Николае, похвалы сия:
Радуйся, веры православныя великий ревнителю;
Радуйся, правды и закона Божьего твердый хранителю;
Радуйся, царей и князей Российских украшение;
Радуйся, возлюбленней стране своей добре послуживый;
Радуйся, усердный о ней ходатаю;
Радуйся, лукавыя советы врагов России презревый;
Радуйся, во дни брани мужество велие явивый;
Радуйся, Богом данный всея России заступниче;
Радуйся, православных стран и народов державный покровителю;
Радуйся, яко предстоиши ныне у Престола Святыя Троицы;
Радуйся, яко со всеми святыми пред Богом о душах наших ходатайствуеши;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 4

Бурю лютых искушений воздвиже отец лжи диавол на страну нашу православную, злобою, клеветою и коварством беззаконных богоотступников собирая, дабы разорити и погубити царство Российское. Ты же, благоверный царю Николае, братоубийство избегнути хотя в державе своей, власть земную и славу оставил еси, и умолял еси Господа, да сохранит на Руси верных Богу и поющих Ему: АЛЛИЛУИЯ

Икос 4

Слыша и видя Отечества своего нестроение и разорение, молился еси, святый Царю Николае, да спасет Пречистая Матерь Господа дом Свой - государство Российское, и явися образ Пресвятыя Богородицы Державныя, и прия Царица Небесная скипетр и державу из рук отверженного народом царя земнаго. И бысть сия милость Матери Божией на радость всем верным, поющим тебе, страстотерпче святый:
Радуйся, волю свою всецело воле Божией предавый;
Радуйся, тленную славу земную ни во что же вменивый;
Радуйся, царский венец на терновый сменивый;
Радуйся, терпению Христову верный подражателю;
Радуйся, хулы и напасти кротко претерпевый;
Радуйся, яко Иов многострадальный праведность во страданиях явивый;
Радуйся, покрову и заступлению Божия Матери страну Российскую вручивый;
Радуйся, пламенныя молитвы о ней к Богу возносивый;
Радуйся, Богом на вольное страдание пред'избранный;
Радуйся, царскую порфиру кровию своею обагривый;
Радуйся, царственною славою на Небеси и на земли почтенный;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 5

Боготечною звездою явилася еси славная Царице Александро, принявши веру Православную и всем сердцем своим возлюбивши молитву, храмы Божии и творения святых отец. Темже во благочестии воспитала чада твоя и уготовила еси их в жертву чистую, непорочную за Христа, воспевая Ему благодарственную песнь: АЛЛИЛУИА.

Икос 5

Видя Господь крепость веры твоея и силу терпения святая царице Александро, дарова тебе вкупе с возлюбленным супругом твоим и чадами вашими испити чашу горьких страданий и приняти мученическую смерть. Ты же, подражая закланному Агнцу Христу, вся претерпела еси и во обители горния душею возлетела еси. Темже поминающе страдания твоя, Христова страстотерпице, воспеваем тебе тако:
Радуйся, в сиротстве твоем Материю Божиею восприятая;
Радуйся, Феодоровскому образу Владычицы посвященная;
Радуйся, любовию к мудрости Богом одаренная;
Радуйся, православных святынь почитательнице;
Радуйся, с супругом своим в любви и благочестии пожившая;
Радуйся, чадам твоим царственным мати любвеобильная;
Радуйся, воинам российским увеченным и искалеченным страдания облегчавшая;
Радуйся, матерей российских в скорбех утешающая;
Радуйся, всем российским женам похвало и радование;
Радуйся, елей милости в сосуде своем собравшая;
Радуйся, верность Отечеству новому и Православней вере даже до смерти сохранившая;
Радуйтеся, святии царственнии мученицы и страстотерпцы, за землю Русскую пред Богом молитвенницы.
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 6

Проповедницы славы Божия и ревнители благочестия явишася, святии царственнии супруги Николае и Александро, и образ благословеннаго брака, союзом любви связанного показавше верным людем и всем чтущим вас и благодарно воспевающим о вас Богу: АЛЛИЛУИА.

Икос 6

Возсияли есте яко звезды богосветлии, в царстве православно Российском, благовернии царю Николае и царице Александро, в житии вашем и в делах любви, милосердия, веры. Вы бо воспитали есте чад своих во благочестии. С ними же заточении бывше богоборцами и врагами России, веру, надежду и любовь к Богу сохранили есте, и мученическую кончину претерпевши, причастницы Царствия Божия явишася. Темже яко покровители земли Русския, молите Бога о спасении Отечества нашего, и всех с любовию вас чтущих и воспевающих тако:
Радуйтеся, образ истинного христианского супружества явившии;
Радуйтеся, любовь Небесную в себе поистине показавшии;
Радуйтеся, бедных и убогих милостивии попечители;
Радуйтеся, изгнании правды ради, яко ваше есть Царствие Божие;
Радуйтеся, яко мзда Ваша многа есть на Небесех;
Радуйтеся, путь узкий прескорбный прошедшии;
Радуйтеся, яко блаженство райское унаследовавшии;
Радуйтеся, яко Ангелы с Вами ликуют на Небеси;
Радуйтеся, яко человецы восхваляют вас на земли;
Радуйтеся, яко людии Российстии с любовию вас прославляют;
Радуйтеся, яко с Господем и Его Пречистою Материею вечно царствуете;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 7

Хотя человеколюбец Господь радость явити людем российским, дарова нам светлаго отрока царевича Алексия, дивнаго молитвенника и заступника нашего. Той бо во смирении сердца глаголал еси: аще аз буду царствовати, да не будут нищие и убозии. Егда же, претерпев многия скорби, недуги и убиение от богоборцев, в Царствие Небесное возшел еси, страстотерпче святый, радостно воспел еси прославившему тя Господу Ангельскую песнь: АЛЛИЛУИА.

Икос 7

Новое знамЕние благоволения Своего к государству Российскому яви тя Господь, святый царевичу Алексие, яко благословен плод молитв Саровскаго старца и чудотворца, слава и упование всех православных христиан Великия России. Божиим же промышлением, яко агнец непорочный, мученическую кончину от безбожных принял еси, ныне же ликуеши яко наследник Царствия Небеснаго. Сего ради победным венцем украшенному и с лики новомучеников и исповедников российских прославленному, ублажаем тя, глаголюще:
Радуйся, преподобному Алексию, человеку Божию тезоименитый;
Радуйся, достойный сыне родителей благочестивых;
Радуйся, юный воине в войске отца твоего;
Радуйся, образ кротости и смирения;
Радуйся, земли Российския украшение;
Радуйся, тяжкую болезнь с терпением носивый;
Радуйся, за всё Господа благодаривый;
Радуйся, яко овча на заколение приведенный;
Радуйся, жертво непорочная, Богу во всесожжение принесенная;
Радуйся, детскую чистоту житием своим явивый;
Радуйся, вместо царства земнаго, Царство Небесное приемый;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 8

Странно есть людем христолюбивым видети, како странствие земное совершивше и путь страдальческий прошедше, дщи царева, равноапостольной Ольге тезоименитая, веры ради мужественно на смерть себя вдаде за Христа Бога, Владыку жизни. Сегодня ради мученический венец приняв, трастотерпица святая Ольго, со Ангелы Престолу Пресвятыя Троицы предстоиши, поя Ей победную песнь: АЛЛИЛУИА.

Икос 8

Вси Небеснии чины и собори святых земли Российския радостно прияша Вас, страстотерпцы царственнии, подвиг земнаго жития своего завершившии и в жизнь вечную вшедшии. Темже вся Церковь Христова восхваляет любовь вашу и служение ваше во славу Господа и Пречистыя Его Матери, мира Заступницы, молитвенно празднует вашу память, и хвалебные песни приносит вам:
Радуйтеся, добродетелям святых предков ваших подражавшии;
Радуйтеся, народу своему верно послужившии;
Радуйтеся, милости и сострадания к людям преисполнении;
Радуйтеся, христианскаго благочестия поборницы;
Радуйтеся, изгнание и поругание смиренно претерпевшии;
Радуйтеся, силою Божиею на подвиг страдальческий укрепленнии;
Радуйтеся, за веру и любовь ко Отечеству своему безчестие приявшии;
Радуйтеся, в скорбех и злостраданиях мужество духовное показавшии;
Радуйтеся, теплотою любви вашея нас согревающии;
Радуйтеся, друг друга тяготы носити нас научающии;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 9

Всякое естество Ангельское удивися терпению и мужеству твоему, страстотерпице святая Татиано, ты бо исполнена всяких добродетелей, и подражающи своей покровительнице святей мученице Татиане с молитвою предала дух твой в руцы Божии и в Царство Небесное вошла еси, идеже со Ангелы и всеми святыми воспеваеши Богу: АЛЛИЛУИА.

Икос 9

ВетиИ многовещаннии не возмогут по достоянию воспети пречудное прославление ваше, страстотерпцы царственнии. Исполнилося бо проречение преподобнаго Серафима Саровскаго, яко "прославившаго мя Царя прославит Бог". Мы же, исполнении радости и благодарности Господу, торжествующе память Вашу, от всего сердца взываем вам сице:
Радуйтеся, вся печали Ваша на Бога возложившии;
Радуйтеся, заповедь любви до конца исполнившии;
Радуйтеся, страдальческий подвиг славно скончавшии;
Радуйтеся, от рук ненавидящих вас смерть без ропота принявшии;
Радуйтеся, Христа Бога в сердцах своих носившии;
Радуйтеся, вечнаго Царствия Христова наследницы;
Радуйтеся, временною смертию пришедшии к жизни вечней;
Радуйтеся, Православною Церковью чудно прославленнии;
Радуйтеся, в радость Господа своего вшедшии;
Радуйтеся, венцы нетления от Него принявшии;
Радуйтеся, яко память ваша с похвалами во Святей Церкви совершается;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 10

Спасти хотя душу свою святая страстотерпице царевна Марие, яко агница Божия смерти себя преуготовила еси, теплым покаянием душу очистила еси, и причащением Тела и Крови Господа нашего Иисуса Христа соединилася еси Царю Славы Христу, воспевая Ему, даровавшему всем царственным страдальцем живот вечный победную песнь: АЛЛИЛУИА

Икос 10

Стену необориму и покров дарова Господь вас сей державе Росийстей, ибо вашими благоприятными молитвами, святии царственнии страстотерпцы, вы спасаете Отчизну вашу земную от всех врагов видимых и невидимых. Сего ради усердно возсылаем благодарение Отцу Небесному и вам, предстателям нашим, хвалу приносим вопиюще:
Радуйтеся, земли Русския защитницы, Богом даровании;
Радуйтеся, об Отечестве и народе нашем молитвенницы предивнии;
Радуйтеся, вся концы страны Российския памятию вашею озаряющии;
Радуйтеся, чудесами многими прославленнии;
Радуйтеся, в нуждах и бедах сущих скорые избавители;
Радуйтеся, болезней душевных и телесных целители;
Радуйтеся, семейнаго мира блюстители;
Радуйтеся, изгнанных правды ради утешители;
Радуйтеся, за нас, грешных, пред Богом споручницы;
Радуйтеся, вечную радость на Небеси обретшии;
Радуйтеся, о всем христианском народе молитвы Богу приносящии;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 11

Пения похвальная приносит земля Русская тебе, святая царевно Анастасие, со всею седмерицею царственных страстотерпцев, от дней убиения вашего до прославления в лике новомученников и исповедников российских, почитающе память страданий ваших. Тем же и мы в напастех и в скорбех к вам прибегаем, и на ваше предстательство уповаем, едиными усты и единым сердцем непрестанно взывающе Богу нашему: АЛЛИЛУИА

Икос 11

Светоподательнии светильники, светом любви Христовыя и огнем чудес ваших землю Русскую освящающих, зрим святых царственных страстотерпцев, и сиянием их Небесныя славы озаряеми, поем и прославляем их песньми таковыми:
Радуйтеся, светильницы, любовию Божиею горящии;
Радуйтеся, сиянием света Небеснаго озарении;
Радуйтеся, благоухания духовнаго преисполненнии;
Радуйтеся, пресветлаго Собора святых земли нашея звезды сияющии;
Радуйтеся, яко вами свет Христов в стране Российской умножается;
Радуйтеся, всех обидимых и неправедно гонимых заступницы;
Радуйтеся, ко Господу моления людей российских приносящии;
Радуйтеся, столпы света, путь к Царствию Небесному нам указующии;
Радуйтеся, предстательством своим у Господа благостроение Отечеству нашему испрошающии;
Радуйтеся, светом невещественным души наша просвещающии;
Радуйтеся, вся благия прошения наша исполняющия;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 12

Благодать, данную вам от Господа видяще, святии царственнии мученицы и страстотерпцы, испросите у Христа Бога нашего стране нашей Российстей мир и спасение. Помозите всем живущим в ней росийским людям иже возлюбили бы жертвенною любовию, обрели бы радость духовную, упокоение душевное, мужество и крепость во испытаниях, во святей вере, в благочестии и чистоте сохранили бы житие свое, да со всеми вами воспеваем Богу победную песнь: АЛЛИЛУИА

Икос 12

Поюще дивное предстательство ваше к Богу, святии царственнии мученицы и страстотерпцы: царю Николае, царице Александро, царевиче Алексие, царевны Ольго, Татиано, Марие и Анастасие, величаем дивнаго во святых Своих Царя Небеснаго, ублажаем мученическую кончину вашу и почитаем вас, яко молитвенников не токмо за землю Русскую, но и о всех верных чадах Церкви Православныя. Веруем, яко дадеся вам благодать недужныя врачевати, обидимыя заступати, на путь правды наставляти, в вере истинней укрепляти всех любовию славящих вас сице:
Радуйтеся Трисиянным Светом озарении;
Радуйтеся, яко зрите всегда Творца своего и Господа;
Радуйтеся, яко нимс Царицею Небеси и земли о мире молящиися;
Радуйтеся, с небесными силами Бога прославляющии;
Радуйтеся, страдальческим подвигом вашим людей российских в вере укрепляющии;
Радуйтеся, страстотерпцы Христовы, диавола победившии;
Радуйтеся, от его коварства и злобы верных избавляющии;
Радуйтеся, светильницы, мрак душ наших благодатию озаряющии;
Радуйтеся, яко вами вся земля наша духовно возрадовашеся;
Радуйтеся, цветы нетления благоуханнии;
Радуйтеся, источницы чудес неистощимии;
Радуйтеся, святии царственнии мученицы и страстотерпцы, за землю Русскую пред Богом молитвенницы.

Кондак 13

О, предивнии в страданиях святии царствении мученицы и страстотерпцы, святый царю Николае и царице Александро с царственними чадами вашими, скорые помощницы всем с верою к вам прибегающим, приимите сие малое моление наше и приносимыя вам хвалы, и сохраните страну нашу Российскую, народ ея и вся грады страны христианския от града, губительства, труса, потопа, огня, меча, от нашествия иноплеменных и междуусобныя брани и от всякаго зла. Умолите Господа об оставлении нам грехов вольных и невольных, да избавльшеся от вечныя смерти молитвами вашими радостно воспоим Богу: АЛЛИЛУИА
(сей кондак трижды)

/поторяется Икос 1/
/затем повторяется Кондак 1/